Susan Jacobsen: "Eg helt ikki, eg sá petti øðrvísi út"

Susan hevði ein tryggan og góðan barndóm í Danmark, har hon vaks upp við foreldrum og trimum systkjum. Mamman er úr Syðradali og giftist dana. Og hóast hon var myrkari enn systkinini, helt hon ikki, at hon var petti øðrvísi.

Men ein dagin, tá Susan var úti og spældi, fekk hon eina viðmerking. 

- Eg haldi, eg gekk í triðja flokki, tá onkur segði argandi við meg, at eg og systkinini ikki kundu hava sama pápa. Eg svaraði jú, sjálvsagt hava vit tað. Men tá rópar mamma meg inn og fortelur mær, at pápi mín ikki er pápi mín, minnist Susan. Hon minnist eisini, at hon ikki hugsaði stórvegis um tað, tí hon vildi heldur út at spæla aftur.

Lítil og eingin kunning um pápan

Kortini var tað ikki heilt gloymt. Og Susan spurdi seg fyri hjá familjuni, tá hon var heima í Føroyum og vitjaði. 

- Tá eg so kom til Føroyar, havi eg prátað eitt sindur við familjuna her heima. Men eingin visti nakað. Og eg spurdi mostir, mammu og onnur, men eingin visti nakað. So gingu nøkur ár, og so spurdi eg aftur, greiðir Susan frá. 

Einasta kunningin, sum Susan fekk, var, at mamman hevði hitt ein amerikanskan hermann í Keypmannahavn í 1963. 

- Pápi mín er amerikanari, føddur og uppvaksin í USA, og hann var so skipaður í starv í Týsklandi, tá hann eitt tíðarskeið vitjaði í Danmark, har hann hevði hitt mammu mína, greiðir Susan frá.

Tá Susan var fødd, hevði mamman roynt at funnið pápan, men uttan úrslit. Hon var sannførd um, at hann hevði givið henni skeivt navn, og so hon gjørdi ikki meira við tað.

Súsan Jacobsen Susan Jacobsen

Susan Jacobsen. Mynd: Bárður Lydersen

Tá børnini komu, reikaðu tankarnir aftur til pápan

Tá Susan flytir heim aftur til Føroya og fær børn, byrja tankarnir aftur at reika aftur til upphavið, sum enn var ókent. Hon royndi eina talgilda DNA-kanning. Men har spurdist einki merkisvert úrslit burturúr kanningini. Ein dagin, tá Susan hyggur í sjónvarp, gerst hon varug við navnið Brian Hjort, sum hevði hjálpt einari kvinnu at finna papa sín. 

Susan ger av at seta seg í samband við hendan Brian. Tilgongdin var drúgv. Eftir enn eina DNA-kanning og nógv samskifti við ymisk fólk, sum møguliga vóru í familju við Susan, fekk Brian hjálp úr Amerika. Í amerikonskum hernaðarskjølum var funnin ein maður, sum vísti seg at vera pápi Susan. 

- Jú, hann var pápi mín, men hann visti einki um meg. Og tað var hann forharmaður um. 

Susan Jacobsen

Susan vísir mynd av familjuni, sum hon fann sum vaksin. Mynd: Bárður Lydersen

Credo byrjað aftur

Credo er aftur fastur partur av skránni, og í nýggjasta partinum av Credo er Susan Jacobsen gestur.

Vit hoyra Susan greiða frá sínum uppvøkstri, sínum mongum royndum at finna pápi sín, og hvussu hon loksins fann hann. 

Tú finnur nýggjasta partin, umframt allar aðrar partar av Credo her.