Alex tvífaldur føroyameistari

Alex Johannesen skeyt best og tryggjaði sær føroyameistaraheitið í Nordisk Trap á skjótibreytini úti í Vík í Leirvík sunnudagin. 

Fyrr í summar vann skjúttin úr Eysturskoti FM-heitið í Automatic Ball Trap.

Alex Johannesen vann kappingina við 117 leirdúgvum av 125. Beiggin, Carsten Joensen, endaði á 2. plássi við 110 dúgvum, og Kristian Johannesen fekk bronsuna eftir umskjóting ímóti Eiriki Elisson, skrivar Skjótisamband Føroya.

Unglingakappingina vann Eiler Ludvig Jacobsen við 85 dúgvum. Marius Gaardlykke og Harry Mikkelsen vóru javnir á 2. plássi. Marius Gaardlykke vann umskjótingina og silvurið, meðan Harry Mikkelsen endaði á 3. plássi.

Hetta er fyrstu ferð, at tað varð kappast um FM í Nordisk Trap í Føroyum, og allir skjúttarnir vóru úr Eysturskoti. 

Tær fýra FM kappingarnar, ið Skjótisambandið hevur skipað í ár, eru nú avgreiddar.