Bora Tjørnuvíkartunnilin næsta ár

Næsta ár verður eftir ætlan farið undir at bora tunnilin til Tjørnuvíkar, sigur Fiskivinnu- og samferðslumálaráðið.

Peningur var settur av til projekteringina í fjør, og í ár er játtan til at gera verkætlanina lidna.

Á fíggjarlógini næsta ár er játtan eisini sett av til Tjørnuvíkartunnilin, og gongst sum ætlað, verður farið at bora, tá komið er nakað út á árið í 2025.

Dennis Holm, landsstýrsmaður, sigur, at samgongan hevur raðfest Tjørnuvíkartunnilin, so sambandið við restina av landinum verður á sama stigi sum í øðrum pørtum av landinum.

Eftir ætlan verður tað tunnilstoymið hjá Landsverki, sum fer at bora tunnilin, og harumframt verða fleiri veitarar knýttir at verkætlanini.