VIKUKJAKIÐ: Er vón fyri semju og samstarvi?

Stríð og ósemjur hava myndað hesa vikuna bæði úti í heimi og her heima. Tí spyr vikupanelið - sum er mannað við Poul F. Guttesen, phd í teologi, Ninu Brockie, fólkaskúlalærara og MA í vegleiðing og Marnu Jacobsen, bókmentafrøðingi - um vón er fyri, semjum og samstarvi? 

Størsta og vanlukkuligasta stríðið, ið hevur myndað tíðindastreymin hesa vikuna, er kríggíð millum Ísrael og Palæstina. Tí mánadagin var eitt ár síðani, at Hamas framdi eitt yvirgangsálop á Ísrael, har 1.200 fólk doyðu og 250 fólk vórðu tikin gíslar. Ísrael svaraði aftur og líka síðan hevur opið kríggj verið millum partarnar. Ísraelsku myndugleikarnir hava sagt, at 726 ísraelskir hermenn hava latið lív síðan 7. oktober í fjør, og 4.500 hermenn fingið skaða. Á hinari síðuni siga heilsumyndugleikarnir í Gaza, at beint undir 42.000 palestinar hava latið lív og gott og væl 97.000 hava fingið skaða hetta seinasta árið. 

Vikupanelið lýsir, hvussu tey fata stríðið, nú kríggið hevur verið í eitt ár, og hevur flutt seg inn í Libanon, har Ísrael bumbar við tí endamáli at raka limir í Hizbollah, sum stuðla Hamas. Kunnu vit taka part ella skilja eitt so langt, torgreitt og syrgiligt stríð, og eru nakrar loysnir?

Ósemjur eru eisini í samband við, at sparingar skulu finnast í samband við fíggjarlógina - millum annað um ætlaðu broytingina í lógini um tillagað starv. Málið er ikki nóg væl lýst, ikki sent til hoyringar, og mann veit ikki, hvørt tað hevur við sær sparingar - var Vikupanelið samt um. Eisini at møguleikin um tillagað starv hevur stóran týdning persónliga og samfelagsbúskaparliga, og júst tí skulu tillagingar kannast væl, halda kjakararnir.

Samstarv og semjur eru eisini torførar at finna, tá tað snýr seg um stórar havnaútbyggingar. Tí hvør skal rinda hvat, og hvussu skulu inntøkur býtast. Duga vit sum heild ov illa at samstarva um stórar íløgur, og hvat er gagnligt at samstarva um og ikki, umrøddi kjakpanelið.

Lurtið eftir vikukjakinum her