Kunnu myndir takast í rættinum uttan loyvi

Føroya rættur viðgerð í næstu viku eitt sakarmál móti einum manni, sum er ákærdur fyri at hava tikið myndir inni í Føroya Rætti uttan loyvi.

Hendingin fór fram fyri sløkum ári síðani, í sambandi við málið um horvna Dánjal Petur Hansen, - nevndur Piddi.

Maðurin, sum nú er ákærdur, var í rættinum tá, rættarfundurin var almennur, og tók myndir av dómara, verja, ákæra, ákærda, vitnum, familjuni hjá Pidda og av nevningunum.

Løgreglan gjørdi húsarannsóknir heima hjá manninum og legði hald á telduna hjá honum.

Kanningar vístu, at maðurin hevði sent Oyggjatíðindum eina mynd av nevningunum.

Myndin er tó ongantíð almannakunngjørd, men ákæruvaldið vil hava rættin staðfesta, at tað eisini er ólógligt at víðarisenda slíkar myndir, hóast myndin ikki er almannakunngjørd.

Maðurin er eisini ákærdur fyri at hava hótt og ærumeitt ein deildarleiðara hjá Føroya Tele, sum varð innkallaður í málinum at tosa um fartelefon og antennuviðurskifti, so at staðfestast kundi, hvar Piddi var klokkan 18.34 tann 4. november í 2011, tá faretelefonin hjá honum fyri seinastu ferð hevði samband við eina antennu hjá Føroya Tele.

Maðurin er eisini ákærdur fyri at hava smuglað vápn til Føroya.

Føroya rættur hevur sett av tríggjar dagar til málið.