Georgia: Forsetin sýtir fyri at leggja frá sær

Forsetin í Georgia fer at leggja frá sær, sjálvt um tíðarskeið hennara rennur út seinni í desember.

Tað gjørdi Salome Zurabisjvili greitt í sjónvarpsrøðu fyri georgiska fólkinum um vikuskiftið.

Tað er tjóðartingið, sum velur forsetan. Men Zurabisjvili góðkennir ikki úrslitið av tjóðartingsvalinum í oktober. Og sambært henni kann eitt ólógliga valt tjóðarting ikki velja nýggjan forseta.

Flokkarnir, sum taptu valið, skuldseta flokkin hjá sitandi forsætisráðharra, Irakli Kobakhidze, fyri at hava framt valsvik í oktober. 

Georgia, samanbrestir í Georgia

Løgreglan í Georgia hevur steðgað mótmælisgongum við harðari hond. (Mynd: Reuters/Ritzau Scanpix)

Roynir at sleppa upp í ES

Georgia hevur síðstu árini roynt at gerast partur av ES. Men russisktvinarligi flokkurin, sum vann tjóðartingsvalið í oktober, vil steðga á við hesi gongd, og samráðingarnar við ES eru fyribils útsettar til 2028.

Síðstu dagarnar hava verið ógvusligar mótmælisgongur í fleiri býum í Georgia. Løgreglan hevur steðgað mótmælunum við harðari hond, og tað hevur elvt til fordøming úr fleiri londum í vesturheiminum.

Dmitrij Medvedev, sum er ovasti fyri russisku trygdartænastuna, sigur harafturímóti, at talan er um eina roynd at fremja kollvelting í Georgia. 

Sambært tíðindastovuni Reuters, sigur Medvedev eisini, at Georgia flytur seg skjótt ukrainska vegin, niður í myrka dýpið. Og tað endar sum oftast galið.