Brandur H. Olsen: "Hetta følist rætt fyri meg, og tað er tað viktigasta"

Blaðungur fór Brandur Hendriksson Olsen av landinum. Størsta felag í Danamark, FCK, hevði fingið eyguni upp fyri føroyska stórtalentinum úr Skálavík. 

14 ár seinni vendir nú 29 ára gamli Brandur Hendrikssson Olsen so nøsina heimaaftur til klettarnar at spæla fótbólt. 

Heldur óvæntað, so eru tað ikki føroysk stórfeløg sum KÍ og HB, ið fáa ágóðan av stóru dygdunum hjá Brandi, men NSÍ. 

NSÍ vísti størst áhuga

Brandur Hendriksson Olsen staðfestir, at NSÍ var tað felagið, ið vísti størst áhuga fyri at fáa seg at spæla við sær. 

"Nú veit eg ikki, um tað var so stórur áhugi frá hinum feløgunum í Føroyum, at fáa meg at spæla við sær. NSÍ er tað felagið, ið hevur víst nógv størst áhuga, og eg eri ordiliga spentur upp á avbjóðingina."

Krumtøppurin á landsliðsmiðvøllinum vísir á, at NSÍ í ár hevur ein sera spennandi hóp. Umframt Brand sjálvan, so eru Jann Julin Benjaminsen og Michal Przybylski eisin komnir til felagið, har Petur Knudsen er heilt stóra stjørnan. 

Nýggi miðvallargeneralurin hjá NSÍ vil tó ikki lova, at stóra tilgongdin merkir, at NSÍ nú er at rokna sum ein FM-biðil. 

"Tilgongdi til felagið heur verið góð, og hópurin er í øllum førum spennandi, og vit fara at alt tað, ið vit eru mentir, fyri at fáa eitt so gott kappingarár sum gjørligt."