"Sjórænararnir" í Nólsoy fríkendir

Teir sleppa undan at ganga plankan út, teir fimm nólsoyingarnir, sum vóru skuldsettir fyri trý lógarbrot í sonevnda sjórænaramálinum, tá ið teir forðaðu Ternuni at leggja at í Nólsoy í september í 2019. 

Frihedsbrevet skrivar, at teir fimm nólsoyingarnir eru í dag fríkendir fyri tvey av lógarbrotunum, sum snúðu seg um at hava forðað løgregluni í at arbeiða, og fyri at hava afturhildið strandfaraskipinum Ternuni.

Tó vórðu teir funnir sekir í at hava órógvað almenna friðin, og vórðu dømdir 10 dagbøtur á 500 krónur fyri tað. Men tann revsingin fall kortini burtur, tí málið er fyrnað.

Teir fimm skulu heldur ikki gjalda sakarmálskostnaðin, tí tað skal tað almenna.

Málið stavar frá 1. september í 2019, tá nólsoyingar skipaðu fyri einum mótmælistiltaki á ferjuleguni í Nólsoy.

Vildu ikki missa Ternuna
Nólsoyingar stóðu aftur til at missa Ternuna, tí hon skuldi avloysa Teistan á Sandoyarleiðini, meðan Teistin var á sleipistøð. 

Afturfyri skuldi Jósup røkja Nólsoyarsiglingina, og tað vildu nólsoyingar ikki finna seg í. 

Millum annað var ætlanin hjá nólsoyingum at forða Ternuni at loysa aftur beinavegin.

Talan skuldi ikki vera um nakað drúgt mótimæli, men bara eina fimtan minuttir langa blokadu fyri at gera vart við ónøgdina. 

Men ein spent støða tók seg upp millum nólsoyingarnar og skiparan á Ternuni, ið noktaði at koyra rampuna niður, so fólk ikki sluppu í land.

Hetta hevði við sær, at nólsoyingar settu endar á Ternuna, og úrslitið var, at Ternan lá við ferjuleguna í fleiri tímar, og ferðafólk sluppu hvørki í land ella umborð.