Lea Eyðbjørg skal spæla á Roskilde festivalinum

"Tað kennist fullkomiliga fantastiskt," staðfestir Lea Eyðbjørg Janusardóttir Trúgvason fegin. 

Unga føroyskt-danska-tónlistakvinnan, ið støðugt vinnur seg fram á danska tónleikapallinum, hevur nú fingið møguleikan at spæla til First Days á Roskilde Festivalinum. 

"Tað er sera óvæntað, tí eg eri so nýggj í tónleikavinnuni. At síggja mítt navn saman við øllum teimum nógv størri og meira viðurkendu nøvnunum á skránni er óveruligt."

Roskilde hevur risastóran týdning

Lea Eyðbjørg er dóttir Janus Trúgvason, ið flest føroyingar kenna frá bólkinum Safir.

Hon spælir inniligan singer-songwriter-tónleik, ið kanska ikki er beinleiðis gjørdur til stórar festivalkonsertir. 

"Eg eri sjálvandi ekkafull um, hvørt eg eri klár at spæla eina so stóra konsert, men tað má eg vera, tá eg havi fingið tað boðið."

Lea Eyðbjørg Janusardóttir Trúgvason

Unga tónlistakvinnan væntar, at tað kann fáa risastóran týdning fyri hennara tónlistarligu yrkisleið, at sleppa at spæla á Roskilde festivalinum. 

"Tað er risastórt fyri meg og í mínum hugaheimi ein staðfesting av, at eg havi tað, ið skal til, fyri at fáa eina yrkisleið innan tónleikin. Tað finst ikki størri pallur í Danmark ella í øllum Norðurlondum enn Roskilde festivalurin. 

Ynskir at sleppa til Føroya

Lea Eyðbjørg gleðir seg nógv til at sleppa at spæla á Roskilde, ið hon vónar fer at bera nógvar møguleikar við sær. 

"Roskilde festivalurin er tann størsta lopfjølin, ið mann kann ynskja sær á síni tónleikayrkisleið. Og at tað longu nú er fallið mær í lut, kennist óveruligt. Eg havi sagt ja, og so vóni eg, at framførslan verður viðvirkandi til, at eg sleppi út at spæla nógvar konsertir aftaná," sigur Lea Eyðbjørg Janusardóttir Trúgvason, sum eisini gjarna vil sleppa til Føroya at spæla konsertir. 

Les eisini: Óskrivaða føroyska blaðið á danska tónleikapallinum

Meira fæst at vita um Roskilde festivalin HER.