Aganevndin skal taka støðu til Árna Frederiksberg

Aganevndin hjá Fótbóltssambandinum skal nú taka støðu til, um Árni Frederiksberg skal hava nakra revsing fyri sín atburð í dystinum millum KÍ og EB/Streym síðsta sunnudag.

Tað hevur starvsnevndin í Fótbóltssambandinum gjørt av nú seinnapartin.

Videoupptøkur frá dystinum vístu, at Árni Frederiksberg hjá KÍ tók upp undir rørarnar á Meinhardi Geyta hjá EB/Streymi, sum svaraði aftur við at sparka Árna Frederiksberg niður. Dómarin gav Meinhardi Geyta reyða kortið, men Árni Frederiksberg fekk onga revsing. 

Kristin Dam Ziska, aðalskrivari í FSF, sigur í stuttari viðmerking, at EB/Streymur kærdi til Fótbóltssambandið, sum eftir at hava hoyrt partarnar í málinum nú hevur sent málið víðari til Aganevndina, soleiðis sum vanliga mannagongdin er.

Hann dugir ikki at siga, nær Aganevndin kemur við sínari niðurstøðu, men at sum oftast gongur tað rímiliga skjótt.