Íslendski forsætisráðharrin: "Mugu vísa sterka fyristøðu í nærumhvørvinum"

Íslendski forsætisráðharrin, Kristrún Frostadóttir, luttekur eisini á trygdarpolitiska toppfundinum í Føroyum.

"Vit her í Norðuratlantshavinum mugu vísa sterka fyristøðu her í okkara nærumhvørvi, tí um vit ikki gera tað, so gera stórveldini tað fyri okkum," segði hon.

Kristrún Frostadóttir vildi ikki tosa spentu støðuna í Norðuratlantshavi upp, men hon ásannaði, at tað er eisini umráðandi, at londini í Norðuratlantshavi hava tætt samstarv og samskifti um støðuna.  

Íslendski forsætisráðharrin nýtti eisini høvið at gera vart við serliga tætta sambandið millum Føroyar og Ísland, og hvussu umráðandi tað er, at tjóðirnar hava tætt samskifti um tað, ið rørir seg her um okkara leiðir.