Joel Cole: "Tað er ein heiður at kunna skapa okkurt, ið hugtekur fólk"

Í hesum videoportrettinum av trælistamanninum Joel Cole eftir Bárð Lydersen greiðir amerikumaðurin, ið flutti til Føroya í 2011, frá sínari tilgongd til list. 

Joel Cole arbeiðir við natúrligum tilfari, ið hann savnar saman uppá ein burðardyggan hátt. 

"Eg byrjaði at arbeiða við træi í garasjuni hjá pápa mínum. Í sínari frítíð, so dámdi pápa mínum væl at skapa, og hann bjóðaði mær inn í garasjuna at gera tað sama."

Kom til Føroya sum skiftisnæmingur

Joel Cole var borin í heim í Minnesota, USA, í 1968. 

Hann vitjaði fyrstu ferð í Føroyum í 1986 sum skiftisnæmingur og valdi at vitja aftur fleiri ferðir, áðrenn hann í 2011 búsetti seg í Føroyum. 

Í dag er Joel Cole ein inngrógvin partur av føroyska listapallinum. 

Góð list skal bjóða av

Tað fyrsta listaverkið yvirhøvur var sikkurt ein grein, sum ein holubúgvi byrjaði at manerera við, heldur Joel Cole. 

"List eigur at vera alt. List eigur at provokera okkurt í okkum øllum, um hon ikki ger tað, so er tað ikki góð list."

Fyri Joel Cole er tað umráðandi, at hansara list kemur út til fólk og verður brúkt. 

"Tað er ein heiður fyri meg at kunna skapa okkurt, ið hugtekur fólk," staðfestir hann.