USA og Kina tingast aftur um handilsavtalu

Fíggjarmálaráðharrarnir í USA og Kina fara nú aftur at samráðast um eina handilsavtalu.

Fyrst í næstu viku hittir fíggjarmálaráðharrin í USA, Scott Bessent, kinesiska starvsfelagan í Stokkhólmi til samráðingar, sigur Bessent við amerikanska miðilin, Fox Business.

Tað verður triðju ferð, at londini royna at finna eina loysn á áhaldandi toll- og handilskrígnum millum londini bæði.

Bessent sigur, at samráðingarnar í svenska høvuðsstaðnum eisini fara at snúgva seg um, at Kina heldur fram at keypa olju úr Russlandi og Iran.