Kunnu ikki kappast á indiska marknaðinum uttan fríhandilsavtalu

Føroyar kunnu ikki kappast á ndiska marknaðinum uttan fríhandilsavtalu. 

EFTA og Stórabretland hava seinasta árið gjørt nýggjar handilsavtalur við India, og sum skilst, kann handilsavtala millum ES og India gerast liðug fyri ársskiftið.

Tað sigur Føroya arbeiðsgevarafelag.

Felagið sigur, at Vinnuhúsið í nógv ár hevur sagt, at Føroyar eru aftanfyri í altjóða handilssambondum, og gongdin bendir á, at munurin bara økist, sigur felagið. 

Aksel V. Johannesen og indiski uttanríkisráðharrin

Á ferðini í India í fjør hitti løgmaður m.a. indiska uttanríkisráðharran, Dr. S. Jaishankar. 

Handilsferð til India

Í fjør var løgmaður á odda fyri handilsferð til India.

Tá var endamálið at styrkja sambondini millum føroyskt vinnulív og indiskar myndugleikar og fyritøkur. 

Men nú, tá okkara kappingarneytar fáa nógv betri marknaðaratgongd til indiska marknaðin, er greitt, at indiski marknaðurin verður neyvan veruliga áhugverdur fyri føroyskar útflytarar.

Ikki fyrr enn Føroyar eisini fáa fríhandilsavtalu, sigur Føroya arbeiðsgevarafelag.

Indiski tollurin á flestu fiskavørum er meira enn 30 prosent uttan fríhandilsavtalu, sigur Arbeiðsgevarafelagið.