Landsverk um Suðuroyartunnilin: Fleiri ivamál eru framvegis

Fyrireikingarnar til verkætlanina veita ikki nóg gott grundarlag at taka støðu út frá, og fleiri ivamál eru framvegis, ið ikki eru nóg væl lýst í lógaruppskotinum.

Tað skrivar Landsverk millum annað í sínum hoyringarsvari til uppskotið til løgtingslóg um Suðuroyartunnilin við tilhoyrandi tunnils- og vegakervum.

Fyrireikingarbeiðini, sum framvegis vanta, eru sambært Landsverki millum annað jarðfrøðiligar frágreiðingar, vegalinjur á Sandi og nøktandi trygdarstrategi, eins og myndugleikauppgávan framvegis er ógreið.

Samanumtikið metir Landsverk, at størri óvissur framvegis eru í tilfarinum, sum eiga at verða kannaðar nærri.

Lógaruppskotið um at fyrireika, prosjektera og bjóða út arbeiðið at gera ein Suðuroyartunnil varð sent til hoyringar 31. oktobur, og hoyringsfreistin var tvær vikur, og sett til fríggjadagin 14. novembur.

Les hoyringarskrivið frá Landsverki her.