Gidsel avgjørdi fyri Hákun og teir - Rakk ikki hjá Óla og GOG

Tað reið leingi um snarið, tá Füchse Berlin vann á Sporting í Champions League, men eitt korter fyri tíð skeyt Mathias Gidsel avgerandi málini fyri Hákun West av Teigum og teir í høvuðsstaðarfelagnum, sum tískil framvegis hava fult stigatal í Champions League.

Heimaliðið var frammanfyri í Max-Schmeling-Halle mestsum allan dystin, men munurin var ongantíð stórur, og 12 minuttir fyri leiklok var javnt 24-24. Tá skoraði Mathias Gidsel trý á rað fyri Füchse Berlin, sum vann 33-29.

Fyri fyrstu ferð í longri tíð skeyt føroyski landsliðsvongurin einki mál fyri berlinfelagið, sum er fremst í sínum bólki við 16 stigum fyri átta dystir.

GOG fjórða heimatapið á rað

Óli Mittún og liðfelagarnir í GOG høvdu kjansin at spæla seg í góða støðu í sínum bólki, tá Wisla Plock vitjaði í Arena Svendborg. 

Føroyingurin skeyt fyrsta málið í fyrra hálvleiki, sum annars hilnaðis illa ímóti stóru verjuni hjá póllendingunum, sum vóru á odda 17-13 í steðginum.

Í seinna hálvleiki spældi fjónliðið munandi betri, og tá eitt korter var eftir at spæla var javnleikur 22-22. Hann helst sær til átta minuttir vóru eftir, tá útiliðið vann sær eina tepra leiðslu, sum helt dystin út.

Óli Mittún, sum skoraði trý og legði upp til fýra mál, minkaði um munin til 29-28, tá 58 minuttir vóru spældir, men Wisla Plock avgjørdi til 30-28. GOG liggur nú á 6. plássi í bólkinum ájavnt við PSG og frammanfyri Eurofarm Pelister og RK Zagreb.