Dagførd lóg um útlendingar í fyrsta lagi í 2027

Næsta summar verður arbeiðið at fara ígjøgnum útlendingalógina liðugt.

Síðani skal Udlændinge- og Integrationsministeriet í Danmark gera uppskot um nýggja útlendingalóg fyri Føroyar.

Ilt er siga, nær uppskotið verður lagt fyri løgtingið. Men tað verður væntandi í fyrsta lagi á vári í 2027. 

Tað sigur landsstýrismaðurin í lógarmálum.

Hanna Jensen, løgtingskvinna, spurdi Bjarna Kárason Petersen, landsstýrimann, um, hvussu líður við at dagføra útlendingalógina.

Fylgibólkur

Landsstýrismaðurin sigur, at ein politiskur fylgibólkur við einum umboði úr hvørjum flokki er við í arbeiðinum at dagføra lógina.

Fundur er við bólkin annan hvønn mánað. 

- Eg meti, at fundirnir í politiska fylgibólkinum ganga væl, sigur Bjarni Kárason Petersen. 

Útlendingalógin, sum nú er, er frá 2001.

Bjarni Kárason Petersen sigur, at hann setti gongd á arbeiðið at dagføra útlendingalógina, tí verandi lóg á nógvum økjum ikki er hóskandi til støðuna á útlendingaøkinum.

Hann sigur, at tvørpolitiska arbeiðið hevur víst, at tørvur serliga er á at dagføra ásetingarnar um arbeiðs- og uppihaldsloyvi og ásetingarnar um familjusameining.