Marita: – Hetta er ordiliga stórt og eg eri glað fyri at vera við

– Tað var ein stuttligur dystur at koma inn til. Eg fekk greið boð um at skjóta, og tað gav úrslit, so tað eri eg nøgd við, sigur bakspælarin Marita Mortensen, sum fekk fitt av spælitíð í dystinum móti Týsklandi í gjár.

Hóast Westfallenhallen er ein stór høll, og tað vóru nógvir áskoðarar til staðar, so bilti tað ikki hjá henni.

– Vit brúka eisini tekn við hondunum, so tað riggar, hóast tað var nógvur larmur í høllini, sigur hon smílandi.

Marita er sera fegin um loksins at sleppa upp í part, og nú vónar hon eisini at fáa ein leiklut í dystinum móti Serbia, sum verður ein harður dystur.

– Vit skulu taka tað góða við frá dystinum móti Spania, tí tá spældu vit sera klókt, sigur hon.

Fyri Maritu er tað ein stór uppliving at vera í Týsklandi í hesum døgum.

– Hetta er ordiliga stuttligt, og hetta er ordiliga stórt at vera við til eitt HM-endaspæl, sigur hon.