Spritt nyttar ikki móti norovirus

Ilt í búkinum, ússalig, kvalma, ongan matarlyst, og so gongur tað á báðar endar. 

Soleiðis er støðan hjá nógvum børnum og vaksnum í hesum døgum, tí tey hava fingið búkilsku. Og tað, ið ger um seg júst nú, er eitt virus, sum kallast norovirus.

Tað serliga er, at tað nyttar lítið at brúka spritt fyri at verja seg móti norovirus.

- Hondspritt riggar ikki móti norovirus, og tí skal mann brúka vatn og sápu at vaska sær um hendurnar við. Og tað skal mann gera í minst 30 sekund, sigur Poula Patursson, kliniskur diætistur og nevndarlimur í Kost- og føðslufelagnum.

Sambært henni smittar norovirus sera illa og er ringt at fyribyrgja. Tí er umráðandi, at fólk, sum starvast til dømis í eini kantinu ella fáast við matgerð aðrastaðni, taka síni fyrivarni, tí tey kunnu smitta nógvar persónar. 

- Er sjúkan heima, og tú ert frísk, so kanst tú kortini vera smittuberi. Tað vil siga, at tú tekur sjúkuna við tær, tá tú fert til arbeiðis, og tí skalt tú ikki koma ov skjótt aftur til arbeiðis, sigur Poula Patursson og vísir á, at mann eigur at lata 48 tímar ganga frá at sjúkueyðkennini eru hildin uppat, til tú fert til arbeiðis aftur.

Í morgunsendingini gevur Poula Patursson góð ráð fyri at sleppa undan norovirus, og hvussu tú sum skjótast kanst koma fyri teg aftur, um so er, tú fært smittuna.