ES lænir Ukraina 673 milliardir næstu tvey árini

Nú eru 1.394 dagar, síðani Russland gjørdi innrás í Ukraina.

Í nátt samdust ES-leiðararnir um at veita Ukraina eitt lán upp á 90 milliardir evrur - tað svarar til næstan 673 milliardir krónur - næstu tvey árini.

Avtalan var samtykt um tvey tíðina í nátt, og ES-forsetin, Antonio Costa, boðar frá á X, at stuðulin til Ukraina fyri 2026 og 2027 nú er tryggjaður.

Týski samveldiskanslarin, Friedrich Merz, sigur sambært NRK, at lánið er eitt greitt tekin til forsetan í Russlandi, Vladimir Putin.

Bart de Wewer

Bart De Wewer. (Mynd: John Thys/AFP/Ritzau Scanpix)

Tvær loysnir

Á toppfundinum vóru tvær loysnir umrøddar:

Annaðhvørt at brúka frystar russiskar pengar í evropeiskum bankum - ella eitt felags ES-lán.

Meginparturin av frystu russisku pengunum er í Belgia, og forsætisráðharrin í landinum, Bart De Wever, stríddist ímóti loysnini at fara eftir russisku pengunum, tí hann stúrir fyri møguligum hevndaratgerðum úr Russlandi,  og tí bleiv ES-lánið loysnin.

- Stóra milliardalánið til Ukraina endar helst sum gáva frá ES, metir Olav Christensen, tíðindafólk hjá TV2:

Hevði Ukraina ikki fingið henda stuðulin, hevði landið havt 45 til 50 milliardir evrur í halli longu næsta ár. 

Russland fegnast um, at frystu russisku pengarnir ikki verða brúktir. Ein sendimaður hjá Vladimir Putin kallar avgerðina ein sigur fyri Russland og eitt afturslag fyri leiðsluna í ES.