Ísak: Høj vil vinna, og tað vil eg eisini

 - Eg vil vinna og menna meg og eri ræðuliga spentur upp á næstu tíðina, sigur Ísak Vedelsbøl, sum i summar skiftir úr svenska IK Sävehof til stórsatsandi Høj Elite í bestu donsku hondbóltsdeildini.

Føroyski strikuspælarin, sum í hesum døgum er í Oslo, har EM-endaspælið í hondbólti byrjar í morgin, hevur skrivað undir trý ára sáttmála við Håndboldfælleskabet Ølstykke-Jyllinge.

 - Eg havi valt Høj, tí eg haldi, at tað er eitt gott felag hjá mær at taka næsta fetið í, og felagið hevur eisini víst stóran áhuga, sigur Ísak Vedelsbøl.

Danska felagið, sum eisini hevur havt landsliðsmálverjan Paula Jacobsen í hópinum, flutti upp í bestu donsku deildina í fjør, og við legendariska vonginum Hans Lindberg á odda, hevur felagið sett sær stór mál. Tað sæst aftur í mongu keypunum síðsta  árið.

 - Tey skriva undir við leikarar, sum bestemt ikki bara koma heim at slappa av og tjena pengar. Spælarar sum Axel Månsson og Lasse Andersson vilja vinna, og tað vil eg eisini í Høj, sigur 21 ára gamli Ísak Vedelsbøl, sum hevur spælt við Neistanum og H71 í føroysku deildini.

Vilja vinna minst ein dyst

Áðrenn Ísak Vedelsbøl hevur tíð at hugsa um nýggja danska felagið, skal hann gera seg lidnan í Svøríki. Allarfyrst liggur kortini risastóra uppgávan, sum eitur EM-endaspælið, har Føroyar skulu royna seg ímóti Sveis, Montenegro og Slovenia í bólkaspælinum í Oslo.

 - Tað keðiliga svarið er, at vit bara skulu inn at gera okkara besta hvørja ferð, men vit hava sett okkum málið at vinna í øllum førum ein dyst. Tað kláraðu vit ikki seinast, sigur Ísak Vedelsbøl.