Økslin hevur tað fínt

Elias Ellefsen á Skipagøtu spældi frá byrjan ímóti Sveis, og við átta málum og fýra uppleggum var føroyski spælskiparin millum avgerandi faktorarnar í 28-28 javnleikinum í fyrsta EM-dystinum í gjár.

Talan var um ein  harðan dyst, og Elias Ellefsen á Skipagøtu hevði eisini ís á økslini beint eftir leiklok í Unity Arena. Men føroyingar kunnu gleða seg til at síggja meir til Kiel-bakkin í morgin ímóti Montenegro, tí økslin hevur tað fínt.

 - Eg havi tað fínt. Eg merki eitt sindur, at eg ikki havi spælt í meir enn ein mánaða, men eg havi tað fínt. Økslin hevur tað fínt, so tað skal nokk ganga, segði Elias Ellefsen á Skipagøtu fyrrapartin.

SÍ EISINI: Øll 28 málini hjá Føroyum ímóti Sveis

Slovenia vann 41-40 á Montenegro í málríkasta endaspælsdystinum í søguni, og tí er ilt at spáa um bólkin og dystin ímóti montonegrinum í morgin.

 - Tað var ikki ordiliga væntað, at Montenegro skuldi klára at vera so leingi við ímóti Slovenia, men tað vísir bara, at teir eisini eru eitt øgiliga sterkt lið, sigur Elias Ellefsen á Skipagøtu, sum væntar enn ein torføran dyst sunnudagin.