Toppfundur: Kanada vil knýta seg tættari at Norðurlondum og Evropa

- Kanada vil knýta seg tættari at Norðurlondum og Evropa.

Tað sigur kanadiski forsætisráðharrin, Mark Carney, sum var við á norðurlendskum toppfundi í Oslo ídag.

Tað er norski forsætisráðharrin, Jonas Gahr Støre, sum hevur tikið stig til toppfundin. Danmark, Finnland, Svøríki, Noreg, Ísland og Kanada vóru við.

- Russland er størsta trygdarhóttanin í Arktis, segði kanadiski forsætisráðharrin á felags tíðindafundi fyrrapartin.

Mark Carney vísti á, at hóttanin er knýtt at trydarstøðuni í Evropa og at hann ynskir tættari samstarv um trygd.

Á tíðindafundinum vórðu stjórnarleiðararnir spurdir um teir ætla at hjálpa Danmark, um landið verður hótt av einum øðrum Nato-landi. Her verður sipað til ætlanirnar hjá USA at taka Grønland.

Um Kanada fer at hjálpa hernaðarliga, vildi Carney ikki siga beinleiðis, men tað eru grønlendingar og danir sum avgera framtíðina, segði hann.

- At Kanada vil knýta seg tættari at Norðurlondum og Evropa, er ein týðandi politiskur boðskapur, sigur Sigurd Falkenberg Mikkelsen, sum er tíðindamaður í uttanríkisviðurskiftum hjá NRK.