Nú skulu Føroyar, Grønland og Áland fáa javnbjóðis sæti í Norðurlandaráðnum

Norðurlendsku samstarvsráðharrarnir hava í dag gjørt av at seta eina nevnd at endurskoða Helsingfors-sáttmálan, við tí endamáli at gera tað møguligt at javnseta Føroyar, Grønland og Áland við hini londini í Norðurlandaráðnum og í Norðurlendska Ráðharraráðnum. 

Tað boðar Norðurlendska Ráðharraráðið frá í dag. 

Nevndin skal eftir ætlan orða eitt uppskot um ítøkiligar broytingar í sáttmálanum og onnur átøk, sum kunnu geva Føroyum, Grønlandi og Álandi javnbjóðis luttøku í norðurlendska samstarvinum. 

Átta nevndarlimir

Nevndin telur átta limir, sum skulu umboða stjórnirnar í øllum Norðurlondunum - eisini Føroyum.

Formannin eigur Danmark, sum frammanundan hevur formansskapin í Norðurlendska Ràðharraráðnum. 

Harumframt verður løgfrøðiligi professarin, Elina Pirjatanniemi, sum starvast á akademinum í Åbo, til taks at hjálpa nevndini í arbeiðnum. Hon hevur sjálv staðið fyri for-arbeiðnum at kanna løgfrøðiligu avleiðingarnar av at endurskoða Helsingforssáttmálan.