Norðuratlantisku umboðini kunnu gerast tungan á vágskálini

Norðuratlantisku fólkatingsumboðini kunnu fáa ein avgerandi leiklut, tá Danmark skal hava nýggja stjórn.

Sambært fleiri veljarakanningum í Danmark verður fólkatingsvalið javnt millum reyða og bláa vongin, og harvið kann ein meiriluti verða treytaður av teimum fýra norðuratlantisku fólkatingsumboðunum.

Tey seinastu árini hava føroysku fólkatingsumboðini peikað á hvør sína stjórn, tað vil siga eina reyða og bláa stjórn, og seinasta veljarakanning sigur eisini, at soleiðis verður tað eftir fólkatingsvalið. 

FV26, Fólkatingsval

Í Grønlandi hevur tað verið siðvenja, at tey hava peikað á eina reyða stjórn, men tað kann broytast nú. 

- Fleiri grønlendskir flokkar hava enn ikki sett navn á, hvønn teir vilja stuðla eftir valið. Aaja Chemnitz, sum varð vald inn seinast, men sum ikki stillar upp til fólkatingsvalið hesa ferð, sigur, at grønlendsku umboðini eiga at samráðast saman, áðrenn tey siga, hvønn tey peika á, sigur Lasse Lindegaard, tíðindamaður hjá DR.

Mett verður, at tað kann gerast trupult og drúgt at skipa nýggja stjórn í Danmark, og at tað kann ganga fleiri vikur, áðrenn nýggj stjórn verður skipað.

Fólkatingsval, LV26

Tíggju flokkar hava boðað frá í dag, at tey taka ikki lut í forfólkaumfarinum, sum annars skuldi vera í kvøld ella í nátt á Christiansborg, og tí er forfólkaumfarið avlýst.