Jana og Sandra: Hvørjar eru stinnastar í útnorði?

Hondbóltskvinnurnar hjá Føroyum og Íslandi skriva enn ein kapittul í hondbóltsstríðnum sínámillum, tá spennandi EM-undankappingardystur verður við Tjarnir í kvøld.

SÍ EISINI: EM-plássið upp á spæl í grannauppgerð

Landsliðini hava spælt eina ørgrynnu av dystum ímóti hvørjum øðrum síðstu árini, og eftir stóru menningina hjá Føroyum eru dystirnir vorðnir alsamt javnari. 

Tað var kortini ikki fyrrenn í 24. royndini, at tað eydnaðist hjá føroysku kvinnunum at vinna á Íslandi. Hetta hendi í fyrsta dystinum í undankappingini í oktober, tá Føroyar vunnu 22-24 í Lambhagahøllini í Reykjavík.

Men trøini vaksa sum kunnugt ikki inn í himmalin. Síðan sigurin, hava Føroyar tvær ferðir lútað ímóti íslendingum. Fyrst í venjingardysti við Tjarnir í november og síðan í síðsta dystinum í HM-miðumfarinum í desember, tá Ísland vann 33-30.

Hvørjar eru so stinnastar í útnorði í løtuni? Í innslagnum omanfyri metir føroyski bakspælarin Jana Mittún og íslendski spælskiparin Sandra Erlingsdóttir um aktuellu støðuna undan stórdystinum við Tjarnir.