Hóttanir frá Trump elva til ringa sálarheilsu í Grønlandi

Fólk í Grønlandi er farin at trívast verri sálarliga, eftir at Donald Trump, forseti,  segði seg vilja hava Grønland.

Vøksturin er sera stórur, vísir nýggj kanning, sum er gjørd fyri heilsustýrið og fróðskaparsetrið í Grønlandi.

Hon sigur, at sálarliga heilsan og sálarligi trivnaðurin eru nógv minkað hetta seinasta árið.

Lívsgóðskan er eisini minkað.

Nú siga 64 prosent seg hava stóra lívsgóðsku. Tey vóru 84 prosent í fjør. 

Mistrivnaður

Sambært kanningini er sálarligi mistrivnaðurin farin úr sjey prosentum upp í 31 prosent. Og 76 prosent siga seg stúra eftir tað, sum amerikanski forsetin hevur sagt um Grønland. 82 prosent stúra fyri, hvussu USA kann ávirka teirra gerandisdag. 

308 fólk vóru við í kanningini, sum var gjørd í januar og februar.

Og Donald Trump hevur ikki gloymt Grønland.

- Minnist til Grønland, hetta stóra, illa stýrda íspetti, skrivaði hann á Truth Social í nátt.