Følsk SMS-boð herja: Útgeva seg fyri at vera frá Samleikanum

Talgildu Føroyar ávara um, at følsk sms-boð frá Samleikanum eru í umferð - og mælt verður til ikki at trýsta á leinkið í sms-boðunum.

Følsk SMS-boð - sonevnd smishing - herja í Føroyum í løtuni. Boðini síggja út at vera frá Samleikanum og biðja teg trýsta á eitt leinki og dagføra tínar upplýsingar. 

Eitt telefonnummar úr Slovenia +386 31 586 826 sigur, at "Frá og við 11.04.2026 kanst tú ikki longur nýta kontu tína. Vinarliga virkja dagførsluna skjótast gjørligt" - og so er eitt leinki viðheft.

- Men hetta eru svik, siga Talgildu Føroyar í tíðindaskrivi.

Talgildu Føroyar siga, at tey senda ongantíð leinki, har tú skalt upplýsa persónsupplýsingar, og tí skalt tú ongantíð trýsta á slík leinki.

- Peningastovnar, fjarskiftisveitarar og løgreglan arbeiða saman fyri at steðga álopunum, men tað er týdningarmikið, at øll eru á varðhaldi, siga Talgildu Føroyar.

- Fært tú slík boð, skalt tú strika tey. Og hevur tú trýst á leinkið ella givið upplýsingar, eigur tú at endurnýggja Samleikan og seta teg í samband við bankan beinanvegin, verður sagt í tíðindaskrivinum frá Talgildum Føroyum.