Sleppa undan netinum við at broyta orð

Lógaruppskot, sum duttu burtur, tá løgtingsval var fráboðað, koma nú aftur í løgtingið.

Eitt teirra er um heilivág hjá teimum, sum koma til Føroya.

Sambært uppskotinum kunnu ferðandi, sum koma til Føroya, hava heilivág við sær til egna nýtslu.

Tá málið var í tinginum fyri valið, var trivnaðarnevndin samd um at mæla løgtinginum til at samtykkja tað. Men so kom valið.

Í galdandi lóg er orðið persónur.

Persónur verður ferðandi

Tað skal broyast til ferðandi.

Orsøkin er, at Kærustovnurin hevur avgjørt, at heimild er at flyta inn heilivág, sum er bílagdur á netinum, til egna nýtslu.

Tað er, at heimildin ikki er avmarkað til ferðandi, sum koma til landið. 

Tað eigur hon at vera, sigur landsstýrið.

Føroyska skipanin og eftirlitið eru innrættað soleiðis, at heilivágur til egna nýtslu ikki kann bíleggjast á netinum.