Vilja hava meira at vita um føroysk sjósíl

Havbúnaðarfelagið og partafelagið Firum hava skrivað undir nýggja avtalu um sjósíl.

Endamálið er at fáa meira at vita um føroysku sjósílini og kanna møguliga ávirkan frá alivinnuni.

Verkætlanin heldur sostatt fram í 2026 og byggir víðari á kanningarnar frá undanfarnum árum. 

Ein týðandi partur av arbeiðinum verður at samanbera lúsatøl og trivnað hjá sjósílum, sum liva nær aling, við sjósíl, sum vera veidd burtur frá aling.

Verkætlanin skal geva betri vitan, um alivinnan og onnur viðurskifti ávirka sjósílastovnin í Føroyum. 

Havbúnaðarfelagið metir, at tað hevur stóran týdning at kanna hetta. 

Áðrenn verkætlanin byrjaði í 2019, var vitanin um føroyska sjósílastovnin sera avmarkað.

Men við verkætlanini legst nýggj vitan aftrat á hvørjum ári.

Veiða sjósíl við gørnum

Fyri at kanna støðuna hjá sjósílum á sjónum verður eitt avmarkað tal av sjósílum veitt við gørnum. 

Harumframt kunnu sílafiskarar senda inn upplýsingar um sjósíl, sum teir hava veitt. 

Til hetta endamálið hevur Firum ment serligar brævbjálvar, sum kunnu nýtast til at senda inn roðsluroyndir.

Í heyst verður drigið um 10.000 krónur millum allar brævbjálvarnar.

Harumframt heldur arbeiðið fram í Eiðisá í Norðragøtu, har síl verða PIT-merkt, og ein antennuskipan skrásetir ferðingina úr ánni á sjógv og aftur. 

Kanningarnar kunnu millum annað geva betri vitan um, hvussu leingi sjósílini eru í sjónum, og um lúsatrýstið á fjørðinum ávirkar ferðingina hjá teimum.