Eitt uppskot um at broyta fosturtøkulógina tekur skap

Líkt er til, at stríðið um fosturtøku kyknar aftur.

Miðflokkurin leggur í løtuni seinastu hond á eitt uppskot um broytingar til fosturtøkulógina, sum bleiv samtykt í desember í fjør.

Sum Kringvarpið skilir, so er talan um at herða fleiri ásetingar í lógini.

Eitt nú skal núverandi áseting um, at ein treyt fyri at fáa fosturtøku er, at kvinnan hevur fingið í boðið at fáa ráðgeving - broytast til eitt krav um, at kvinnan skal hava fingið ráðgeving.

Ætlanin er eisini áseta ein ávísa umhugsunartíð, sum skal gera tað møguligt at angra avgerðina at fáa fosturtøku.

Í verandi fosturtøkulóg kann kvinnan fáa fosturtøku framda eftir 12. viku uttan loyvi í serligum førum. Hesi undantøk ætlar Miðflokkurin partvíst at strika ella herða.

Sum Kringvarpið skilir, arbeiðir Miðflokkurin eisini við fáa til vega hagtøl - eitt nú við anonymiseraðum spurnarskema - fyri at fáa yvirlit yvir, hví kvinnur í Føroyum velja at fáa fosturtøku.

Meira verður um málið í tíðindunum klokkan seks, tá Steffan Klein Poulsen, formaður í Miðflokkinum, kemur á gátt.