- Tíðindi, mentan og ítróttur
Obama: Handilsavtala skal hjálpa teimum veiku
![](https://kvf.fo/sites/default/files/styles/grein-ovasta-mynd/public/topfundur-brussel-26032014.jpg?itok=2ysDatuu)
<p>Ein komandi fríhandilsavtala skal gagna øllum, ikki minst teimum veiku, var boðskapurin hjá forsetanum í USA, Barack Obama, á toppfundinum í Brússel í dag.</p>
<p>Eitt av teimum stóru og týdningarmiklu málunum, ið varð umrøtt á toppfundinum í dag, var komandi fríhandilsavtalan millum EU og USA.</p>
<p>- Eg haldi, tað er týdningarmikið, hjá okkum leiðarum, at hugsa um, at avtalan skal gagna okkum øllum, ikki bert teimum vælbjargaðu, segði Obama.</p>
<p><strong>Vísir atfinningar frá sær</strong></p>
<p>Barack Obama vísir atfinningar, ið hava verið frammi undan toppfundinum í Brússel í dag, frá sær, áðrenn atfinningarsomu røddirnar hava sæð fríhandilsavtaluna.</p>
<p>- Eg havi arbeitt miðvíst fyri at verja brúkararnar, og eg havi ongar ætlanir at skriva undir avtaluna, áðrenn smálutirnir eru komnir uppá pláss, segði Obama.</p>
<p>ES-forsetin, Herman von Rompuy, og ES-nevndarformaðurin, José Manuel Barroso, vóru eisini á toppfundinum saman við forsetanum í USA í dag.</p>
<p><strong>Avtalan skal hjálpa fyritøkum</strong></p>
<p>Fríhandilsavtalan skal millum annað tryggja meira samstarv tvørtur um Atlantshavið, so tað verður lættari hjá fyritøkum at fóta sær á amerikanska og evropeiska marknaðinum.</p>
<p>- Ein nýggj avtala er umráðandi fyri at tryggja vøkstur, eisini hjá smærri fyritøkum. Avtalan kann eisini tryggja fleiri størv, segði José Manuel Barroso, ES-nevndarformaður.</p>
<p>Tøl frá Dansk Industri vísa, at ein avtala millum EU og USA kann økja útflutningin hjá Danmark til USA við 27 milliardum og fáa 15.000 fólk í starv, skrivar Ritzau.</p>