Heimatænastan: torført at fáa útbúgvið starvsfólk

Stóra útbyggingin á eldraøkinum hevur gjørt tað torførari hjá Heimatænastuni at fáa útbúgvið starvsfólk.

Í Heimatænastuni í Suðurstreymi eru til dømis fleiri ófaklærd starvsfólk enn faklærd. 58 prosent eru ófaklærd.

Tjarnargarður er útbygdur, og Boðanesheimið er tikið í brúk.

Faklærd fólk fara úr Heimatænastuni á heimini at arbeiða.

Harafturat er siðvenjan í øllum landinum, at tey ófaklærdu verða ikki send til hús, so hvørt sum útbúgvin fólk koma úr Heilsuskúlanum ella, tá faklærd søkja leys størv.

Annika Olsen, landsstýriskvinna, hevur svarað spurningum frá Rigmor Dam, løgtingskvinnu, um faklærda og ófaklærda arbeiðsmegi í Heimatænastuni í Suðurstreymi.

Men eisini í Eysturoynni eru lutfalsliga nógv ófaklærd starvsfólk í Heimatænastuni.

Greið ábending er um, sigur landsstýriskvinnan, at heilsuhjálparar yvirhøvur raðfesta arbeiði á eldrabústovnum fremst.