Cameron vil herða lógirnar

Bretski forsætisráðharrin, David Cameron, hevur boðað frá, at Bretland fer at herða lógirnar fyri tey sum ætla sær til onnur lond at stríðast saman við víðgongdum felagskapum.

- Løgreglan og marknavørðar fáa loyvi at leggja hald á pass, um mett verður, at onkur ætlar sær til onnur lond at stríðast saman við víðgongdum felagskapum. Og loyvi verður eisini givið at steðga fólkum, sum koma úr øðrum londum, um ivi er um, at tey hava brotið bretska lóg.

Tað segði David Cameron í australska tjóðartinginum, har hann er á vitjan.

Og flogfeløg sum ikki halda treytirnar, sum myndugleikarnir hava ásett, verða revsað hart, sigur forsætisráðharrin. Tað kann enda við, at loyvið at flúgva til Bretlands verður tikið aftur.

Bretska trygdartænastan hækkaði stigið fyri yvirgang uppí tað næsthægsta í august, tí vandi er fyri at fólk sum eru komin aftur til Bretlands, eftir at hava verið í øðrum londum og kríggjast, kunnu elva til yvirgang.