Upptøkur í svarta kassanum vátta illgruna

Óhugnaligi illgrunin hjá franska ákæruvaldinum er nú váttaður, eftir at tann seinni svarti kassin í Germanwings flogfarinum, ið datt niður 24. mars, er funnin.

Andreas Lubitz, ið var stýrimaður á túrinum úr Barcelona í Spania til Düsseldorf í Týsklandi, stýrdi flogfarið í eitt berg har suðuri í fronsku Alpunum við beráddum huga.

Tað er niðurstøðan hjá franska ákæruvaldinum, ið longu hevur rannsakað upptøkurnar í tí seinna svarta kassanum, ið varð funnin í gjár, skírisdag.

Greinin heldur fram niðanfyri

2nd black box on #Germanwings flight confirms "co-pilot acted deliberately", say investigators http://t.co/WY3m3w5MVS pic.twitter.com/NIT8Zo0PMJ

— BBC Breaking News (@BBCBreaking) April 3, 2015

- Upptøkurnar vísa, at stýrimaðurin við sjálvstýraranum fleyg fólkini í deyðan. Harumframt broytti stýrimaðurin sjálvstýraran fleiri ferðir, so ferðin øktist, siga kanningarfólk sambært BBC.

Í svarta kassanum, ið varð funnin í gjár, er skrásett, hvørja kós flogfarið hevði og upplýsingar um hæddina. Harumframt er eisini skrásett, hvørjar knøttar trýst varð á áðrenn flogfarið brast í bergið.

Umleið 500 fólk arbeiða við at eyðmerkja líkini, og at fáa endaliga greiðu á, hví stýrimaðurin valdi at stoyta Germanwings flogfarið niður í Alpurnar har suðuri í Fraklandi 24. mars.