Griksku bankarnir lata upp aftur í morgin

Griksku bankarnir lata upp aftur í morgin eftir at teir hava verið stongdir í tríggjar vikur.

Evrulondini hava samtyt at lata Grikkalandi neyðugu lánini, og treytirnar fara at merkjast longu í morgin - ikki bert millum grikkar sjálvar - men eisini hjá ferðafólki, tí matstovurnar skulu í morgin hækka meirvirðisgjaldið við tíggju prosentum úr 13 upp í 23 prosent.

Hækkingin verður mett at geva grikska statskassanum seks milliardir krónur meira hetta til nýggjárs.

Meirvirðisgjaldið hækkar ikki bert á matvørum, sum kjøti og fiski, men eisini á øðrum gerandisvørum sum mjólkaúrdráttum og kaffi.

Almennar ognir skulu einskiljast

Eitt annað krav er, at Grikkaland skal einskilja statsognir fyri 375 milliardir krónur, m.a. bankar, jarnbreytir, havnir.

Grikski staturin eigur fýra teir størstu bankarnir í landinum, sum allir hava brúk fyri fígging úr evropeiska miðbankanum.

Millum aðrar fyritøkur, sum møguliga skulu einskiljast eru statsoljufelagið og elorkuveitingin.

Og so verða fleiri grikskar oyggjar væntandi seldar ríkfólki, sum vilja eiga eina oyggj og egna sólstrond í Egeara-havinum.

Pengarnir frá sølu og einskiljing skulu setast í ein grunn, ið fer at hava til endamáls at endurfíggja bankarnar og gjalda ovurstóru skuld teirra.