Steðgar í Føroyum: Heimin runt í pinkuflogfari

Hon hevur longu verið drúgv, og er ikki liðug enn - ferðin hjá norðuríranum, Norman Surplus, í pinkuflogfarinum, sum fór á flog fyri fimm árum síðani, í 2010.

Norman Surplus hevur á ferðini runt heimin verið í 23 londum, og tá hann hevur nátt málinum, hevur hann tilsamans verið í 26 londum við pinkuflogfarinum hjá sær.

Fríggjakvøldið lendi hann í Vága floghavn, eftir at hava flogið úr Íslandi til Føroyar. Ein túrur sum tók honum útivið fimm tímar í lítla, gula flogfarinum.

Greinin heldur fram niðanfyri

Video: Soleiðis sær pinkuflogfarið hjá Norman Surplus út

- Eg geri hetta fyri at varpa ljós á krabbamein, sum eg sjálvur fekk í 2003. Tá søgdu læknarnir, at eg bert hevði 40 prosent sannlíkindi at liva í hálvt annað ár, sigur Norman Surplus.

Ein onnur orsøk, at hann flýgur heimin runt í flogfarinum, er eisini fyri at prógva, at tað væl ber til at flúgva heimin runt í einum so lítlum flogfari, ið ikki er nógv størri enn ein motorsúkkla.

Tryggari enn vanlig flogfør

At flogfarið hjá Norman Surplus ikki er nógv størri enn ein motorsúkkla, merkir ikki, at flogfarið er ótrygt at flúgva í - tvørturímóti, sigur hann.

- Flogfarið hjá mær klárar seg betur enn vanlig flogfør, tá floglíkindini eru vánalig. Flogfarið eisini tryggari enn vanlig flogfør, tá nógvur vindur er, sigur Norman Surplus.

Pinkuflogfarið kann flúgva meira enn 900 kilometrar í einum, og flýgur vanliga í eini hædd, sum er millum 300 og 3.000 metrar - alt eftir, hvussu høg fjøllini eru.

Fólk halda, hann er komin illa fyri

Allastaðni, hann er komin á ferðini, tykjast fólk taka synd í honum, og halda, at hann hevur tørv á hjálp, tá fólk síggja pinkuflogfarið, hann brúkar á ferðini runt heimin.

- Hasin hevur uttan iva brúk fyri hjálp, siga fólk vanliga, tá eg komi til nýggj lond. Fólk eru tí eisini sera hjálpsom og fitt, sigur, Norman Surplus, nú hann steðgar nakrar dagar í Føroyum.

Viðrar, fer Norman Surplus úr Føroyum aftur einaferð í næstu viku í royndini at seta met sum tann fyrsti, ið hevur flogið heimin runt í einum pinkuflogfari.