Taka nú avgerð um endurgjaldskrav skal reisast

Býráðið á Tvøroyri fer í kvøld at avgera, um kommunan skal senda rokning fyri útreiðslurnar, sum kommunan hevði í sambandi við ætlaðu vitjanina hjá drotningarhjúnunum í summar.

Kommunan brúkti 46.000 kr. í sambandi við vitjanina, sum bleiv av ongum, tí hon skuldi vera samstundis sum fólkatingsvalið var.

SÍ EISINI Vitjar kortini ikki nú: Drotningavitjanin útsett

Sama dag, sum drotningin og prinsurin skuldu vitja á Tvøroyri, boðaði borgarstjórin á Tvøroyri, Kristin Michelsen, frá, at landið eigur at rinda kommununum, sum hava havt útreiðslur av vitjanini, endurgjald, nú vitjanin varð útsett við so lítlum skotbrái.

Í dag sigur Kristin Michelsen, at tað veldst um, hvat býráðið sigur í kvøld, um rokningin hjá kommununi verður send.

SÍ EISINI Kanna kostnaðin fyri útsetta drotningavitjan

Sambært yvirliti, sum Útvarpið fekk frá Løgmansskrivstovuni góðan mánað eftir, at vitjanin varð avlýst, kostaði avlýsta drotningarvitjanin landskassanum 54.000 kr.

Umframt Tvøroyri fyrireikaðu tríggjar kommunur seg til at taka í móti drotningini og hennara fólki í juni. Tær eru Hvalba, Sandur og Tórshavn.