Rentan í USA hækkar

Tað er ikki óvæntað, at rentan hækkar, tí tað gongur væl í amerikanska búskapinum. Janet Yellen, tjóðbankastjóri, metir, at fíggjarkreppan í USA er av.

Tí ber til at hækka rentuna eitt vet, uttan at tað steðgar framgongdini í búskapinum. Roknað verður ikki við, at rentuhækkingin fer at fáa stórvegis ávirkan á fíggjarmarknaðirnar.

Fíggjarkreppan hevði við sær stóra afturgongd í amerikanska búskapinum, og tí varð leiðandi rentan lækkað munandi.

Samstundis keypti tjóðbankin stórar nøgdir av virðisbrøvum. Eisini í Evropa er rentan lág, men eygleiðarar vænta ikki, at hon hækkar í bræði, hóast USA hevur hækkað sína rentu.