Frakland havnar fríhandilsavtalu

- Vit fara ongantíð at víkja frá okkara grundleggjandi virðum, sigur Franski forsetin, François Hollande. Fríhandilsavtalan nevnist TTIP.

Nakað frammanundan boðaði franski samráðingarleiðarin, Matthias Fekl frá, at samráðingarnar kanska fóru at detta niðurfyri, tí USA var hvørki til at høgga ella stinga í í sínum krøvum til avtaluna.

Fronsku boðini eru tekin um, at Europa er í iva um avtaluna, tí hon setir til síðis skipanir sum hava við umhvørvið at gera, og eisini heilsuna hjá brúkarunum.

USA leggur trýst á ES

Stóru altjóða feløgini mestsum sleppa at gera sum tey vilja, um avtalan verður samtykt. Mánadagin almannakunngjørdi umhvørvisfelagskapurin, Greenpeace, loynilig skjøl frá samráðingunum sum eingin fær innlit í.

Týskir miðlar sum fingu skjølini, boðaðu frá, at USA hevur lagt trýst á ES, fyri at strika reglur sum skulu verja umhvørvið og heilsuna hjá fólki.

Handilsráðharrin í ES, Cecilia Malmstrøm, boðaði stutt eftir frá, at tað er ógrundað at tvíhalda um, at reglurnar í ES ikki verða hildnar, tí tað skulu tær, segði hon.