Aleqa Hammond fór sjálv úr Siumut

Tað sigur hon við donsku tíðindastovuna, Ritzau. Hon sigur, at flokkurin kom til ta niðurstøðu, at hon kundi velja ímillum at fara úr Fólkatinginum og at lata varalimin taka sæti har.

Ella kundi hon halda fram í Fólkatinginum, og ikki vera limur í Siumut, men uttanflokka. Aleqa Hammond sigur, at hon valdi at fara úr Siumut, tí hon vildi ikki siga fólkatingssessin frá sær.

SÍ EISINI Aleqa aftur nýtt skattapening til privat endamál

Tí heldur Aleqa Hammond fram í Fólkatinginum. Hon sigur at hon fekk nógvar atkvøður á fólkatingsvalinum, og fer at virka fyri teimum málum, sum hon varð vald uppá.

Aleqa Hammond kom í andróður um vikuskiftið, tá tað kom undan kavi, at hon hevði nýtt 13.000 kr. av einum pengakorti hjá Fólkatinginum til egna nýtslu.