Oljuprísurin lækkar aftur

Prísurin lækkar eftir at ein uppgerð vísir, at amerikansku oljugomslurnar eru størri enn roknað varð við. Samstundis hevur oljumálaráðharrin í Irak biðið oljufeløgini í landinum um at økja søluna av olju, so landið fær størri inntøkur av oljuni.

Oljuprísurin hækkaði í gjár, tí ábendingar komu um, at londini í OPEC fara at mæla til at minka søluna av olju, tá tey hittast á fundi í september.

Iran hevur boðað frá, at landið verður við á OPEC-fundinum í Algeria, og at landið fer at stuðla einum uppskoti um at minka um søluna, fyri at fáa prísin á olju í eina tryggari legu.

Eingin stórvegis hækking í eygsjón

Eygleiðarar rokna ikki við at oljuprísurin fer at hækka stórvegis, eftir at amerikansku oljugoymslurnar eru størri, enn mett var, tí nógva summarkoyringin í USA er um at vera av, og tí fer ølju- og bensinsølan at minka.

Roknað verður heldur ikki við, at OPEC tekur nakra avgjørda støðu um sølu av olju, hóast limalondini fara at umrøða prísin.

Í dag verður ein tunna av WTI-olju, sum skal latast í oktober, seld fyri góðar 47 dollarar fyri tunnuna, og Brent oljan fyri góðar 49 dollarar fyri tunnuna. Tað er á leið ein dollara lægri enn í gjár.