Góðtaka ikki skattaavgerð

Stjórnin í Írlandi tók avgerðina á fundi fríggjadagin. Eitt uppskot um at kæra verður lagt fyri tjóðartingið mikudagin, upplýsa myndugleikarnir.

ES tók avgerðina tí mett verður, at Apple bert hevur goldið smávegis upphæddir í skatti í Írlandi, hóast felagið hevur tjent fleiri hundrað milliardir krónur av virkseminum í Evropa.

Partafelagsskatturin í Írlandi er 12,5 prosent, men sambært ES hevur Apple goldið nógv minni enn tað í skatti. Fyritøkan skal tí gjalda 97 milliardir krónur í revsiskatti.

SÍ EISINI Apple fær risa skattarokning

Góðtekur írska stjórnin at taka ímóti pengunum frá Apple, so viðgongur hon samstundis at hava givið stóra altjóða felagnum sersømdir, og tað verður mett sum kappingaravlagandi.

Amerikanski forsetin, Barack Obama, sigur seg stúra fyri, at tað verða amerikansku skattgjaldararnir, ið mugu rinda fyri bótina, sum Apple hevur fingið frá ES.

Talsmaðurin fyri Hvítu Húsini, Josh Earnest, sigur, at Apple kann draga bótina frá pengunum, sum fyritøkan skyldar amerikanska statinum.

Finnast at ES

Barack Obama, forseti, sigur, at tað er ikki rættvíst mótvegis amerikansku skattgjaldarunum. Hann heitir á ES um at samstarva um skattareglur, ið skulu vera galdandi kring allan heimin.

ES-nevndin er komin eftir, at Apple hevur rindað so lítlan skatt í Írlandi, at talan er um almennan stuðul.

Amerikanska fíggjarmálaráðið hevur funnist hvassliga at ES fyri at hava álagt Apple at rinda næstan 100 milliardir krónur í revsiskatti.