Trolari settur í samband við kriminalmál

Grønlendski trolarin Polar Nanoq, sum fór úr Hafnarfirði í Íslandi til Grønlands leygarkvøldið, er nú á veg aftur til Íslands

Polar Nanoq kemur til Íslands kvøld, tí trolarin er settur í samband við eitt mál hjá íslendsku løgregluni, sum leitar eftir einari 20 ára gamlari kvinnu

Mynd: Savnsmynd/RUV

Høgni Djurhuus

Bjarni Mohr

18.01.2017 - 08:17

Polar Nanoq kemur til Íslands kvøld, tí trolarin er settur í samband við eitt mál hjá íslendsku løgregluni, sum leitar eftir einari 20 ára gamlari kvinnu. Kvinnan var í býnum í Reykjavík leygarnáttina, men eingin veit um hana at siga síðani.

Orsøkin til áhugan fyri grønlendska trolaranum er tann, at ein av manningini leigaði ein bil, sum líkist nógv bilinum, sum vakmyndatól hava sæð oftari enn eina ferð tíðliga leygarmorgunin.

Løgreglan heldur orsøk vera til at kanna, um júst hesin bilurin hevur samband við horvnu kvinnuna. Harafturat eru skógvarnir hjá horvnu kvinnuni funnir 300 metrar haðani Polar Nanoq lá.

Løgreglan sigur, at eingin á grønlendska trolaranum er avhoyrdur ella skuldsettur.