Spurnakanning: Trump hevur vánaliga undirtøku

Amerikanarar eru ikki nøgdir við mátan, Donald Trump hevur uppført seg áðrenn hann yvirhøvur hevur sett fótin inn um í Hvítu húsunum.

48 prosent av amerikanarum eru ónøgd við Trump. Tað kemur fram í eini nýggjari meiningakanning, Wall Street Journal og NBC News hava gjørt.

Sostatt er greitt, at amerikanarar hava síni fyrivarni móti Donald Trump longu áðrenn hann er byrjaður í forsetaembætinum í USA.

Fólk stuðla enn Obama

Ímeðan amerikanarar eru misnøgdir við næsta forsetan, er sama misnøgdin ikki at hóma tá tey vórðu spurd um skjótt fráfarna forsetan í USA.

Amerikanarar eru í løtuni betri nøgdir við Barack Obama enn teir nakrantíð hava verið. 56 prosent av teimum spurdu siga, tey eru vælnøgd við Obama.

Barack Obama hevur verið forseti í USA síðani 20. januar í 2009. Donald Trump verður forseti nummar 45 í amerikansku forsetasøguni.