Brimil sleipað Búgvan og Norðheim

Mánakvøldið boðaði trolbáturin Búgvin frá, at teir høvdu fingið trolið um skrúvuna. Teir vóru staddir á Skeivbanka, har teir trola eftir havtasku.

Brimil kom til Búgvan um tveytíðina týsnáttina og sleipaði hann til Vestmanna, hagar skipini komu klokkan ellivu fyrrapartin í gjár.

Í morgun klokkan fimm komu so boð frá skeljabátinum Norðheimi um, at teir høvdu maskintrupulleikar stutt suður úr Eystnesi.

Brimil var hjá Norðheimi longu klokkan sjey og sleipaði hann til Oyrar, hagar skipini komu klokkan tíggju - bert fimm tímar eftir, at Norðheim bað um hjálp. Norðheim dreggjar eftir skeljum eystan fyri Føroyar.