Óttast nýggjar yvirgangsatsóknir

- Vit kunnu ikki útiloka, og ein stórur bólkur av fólkum møguliga hevði tilknýti til atsóknina í Manchester mánakvøldið, segði Theresa May, forsætisráðharri, eftir ein fund við trygdarnevndina, Cobra, í gjárkvøldið.

Samstundis hevur bretski verjumálaráðharrin givið boð um, at bretskir hermenn kunnu hjálpa løgregluni í sínum arbeiði. 5.000 hermenn hava fingið boð um at skipa fyri vaktarhaldi á týðandi almennum støðum.

Hetta er fyrstu ferð síðani 2003, at bretski herurin hevur fingið boð um at halda vakt. Tá ljóðaði, at limir í al-Queda høvdu ætlanir um at søkja at einum flogfari hjá British Airlines.

SÍ EISINI May: Ætlanin var at drepa børn og ung

Ikki síðani í 2007 er tilbúgvingin sett upp á hægsta stig, og tað er bara hent tvær ferðir fyrr. Myndugleikarnir bera ótta fyri, at fleiri hjálptu 22 ára gamla Salman Abedi, tá hann søkti at konserthøllini í Manchester, og at hini kunnu søkja at málum í Bretlandi.

Bretsk bløð skriva, at yvirgangsmaðurin kom til Bretland úr Libya, áðrenn hann framdi atsóknina, og bretska løgreglan roynir nú at fáa greiðu á, um hann lørdi at gera bumbur, meðan hann var í Libya.

Bæði Islamskur Statur og al-Queda eru virknir í Libya, og stríðast ímóti stjórnardeildunum um valdið í landinum.