Fleiri handtøkur eftir Manchester-atsókn

Bretska løgreglan hevur tikið tríggjar mans, so nú eru fýra mans tiknir. Men enn er ógreitt, um teir hava nakað við yvirgangsatsóknina at gera.

Ein av teimum tiknu er bróðir til 22 ára gamla mannin, sum framdi atsóknina á einari konsert í Manchester mánakvøldið, tá 22 fólk lótu lív og 64 onnur vórðu særd.

SÍ EISINI Støðan »álvarslig« hjá 20 fólkum

Bretski innanríkisráðharrin sigur, at tað er ivasamt um 22 ára gamli maðurin var einsamallur um atsóknina. Í gjárkvøldið hækkaðu myndugleikarnir yvirgangstilbúgvingina upp á hægsta stig.

Tað gjørdu bretsku myndugleikarnir, tí vandi er fyri meir yvirgangi í landinum. Tað boðaði bretski forsætisráðharrin, Theresa May, frá í gjárkvøldið.

- Vit kunnu ikki útiloka, at ein stórur bólkur av fólkum møguliga hevði tilknýti til atsóknina í Manchester mánakvøldið, segði hon eftir ein fund við trygdarnevndina, Cobra.