Tættari millum flokkarnar

Parlamentsvalið í Bretlandi í dag verður spennandi, tí munurin millum konservativa stjórnarflokkin og Labour er nógv minkaður í valstríðnum.

Konservativi flokkurin hjá Theresu May, forsætisráðharra, stóð til at vinna stórsigur, tá valið varð útskrivað, men nýggjastu kanningarnar vísa, at nú er munurin millum teir báðar stóru flokkarnar millum eitt til 12 prosent.

Veljarin fer í dag eisini at gera av, um Theresa May ella Labour-leiðarin, Jeremy Corbyn, skal standa á odda fyri samráðingunum um at taka Bretland úr ES.

SÍ EISINI Bretar velja nýtt tjóðarting

Yvirgangsatsóknirnar í Manchester og London seinastu tíðina hava skuggað fyri málinum um Brexit.

Týdningarmesti spurningurin er, hvør fær bestu avtaluna fyri Bretland í Evropa í framtíðini, segði Theresa May á einum valfundi mikukvøldið.

Valið er einfalt, sigur Jeremy Corbyn. Skal haldast fram við sparipolitikkinum og skerjingum í fimm ár aftrat, ella skulu vit fáa okkurt annað? spyr leiðarin í Labour.  

May kann vikna

Á parlamentsvalinum fyri tveimum árum síðani fekk konservtivi flokkurin einsamallur meiriluta í parlamentinum.

Jeremy Corbyn tykist vera væl umtóktur millum veljararnar, men hann er illa umtóktur í arbeiðaraflokkinum. Vinnur Labour parlamentsvalið í dag, er tað ein stórhending, siga politiskir eygleiðarar.

Vinnur Theresa May ein tepran sigur, viknar støða hennara í konservativa flokkinum, og hon fer eisini at standa veikari í samráðingunum við 27 ES-londini um Brexit, siga eygleiðararnir.