Hittust undan forsetavalinum

Sonur Donald Trump forseta, Donald Trump, yngri, hevur váttað, at fundur var millum hann og ein russiskan advokat við sambandi til Kreml undan amerikanska forsetavalinum, skrivar New York Times.

Donald Trump yngri sigur, at hann frammanundan hevði fingið tilsøgn um, at hann fór at fáa tyngjandi upplýsingar um demokratiska forsetavalevnið, Hillary Clinton, frá russisku Natalia Veselnitskaya, men at ongar upplýsingar av týdningi komu fram á fundinum.

SÍ EISINI Trump: Clinton fekk nógvar ólógligar atkvøður

Umframt Donald Trump - yngra - var versonur Donald Trump, forseta, Jared Kushner, og leiðarin fyri valstríðið hjá Donald Trump, Paul J. Manafort, við á fundinum.

Amerikansku myndugleikarnir leita eftir prógvum fyri, at umboð fyri valstríðið hjá Donald Trump og fólk við sambandi til russisku myndugleikarnar arbeiddu saman í loyndum.

Fundaðust fyri einum ári síðani

Fundurin millum Donald Trump, yngra, og russiska advokatin var 9. juni í fjør í Trump-torninum í New York - tvær vikur aftaná at Donald Trump var tilnevndur forsetavalevni hjá republikanarunum.

- Tað vísti seg, at russiski advokaturin ongar upplýsingar hevði um Hillary Clinton ella forsetavalstríð hennara, men at veruligu ørindini hennara vóru at fáa samband við fólk, sum kundu gera sína ávirkan galdandi, so gongd kundi fáast á eina uppsteðgaða ætlan, ið hevði til endamáls at ættleiða russisk børn til USA, upplýsir Donald Trump, yngri.

Hetta er fyrstu ferð at váttan er fingin fyri, at fundur var undan amerikanska forsetavalinum millum umboð fyri russiskar myndugleikar og fólk kring Donald Trump og forsetavalstríð hansara.